Joe Biden, Madaxweynaha Mareykanka, oo laga helay COVID-19

  Joe Biden ayaa Khamiistii laga helay xanuunka COVID-19, waxaa sidaas shaaciyay Aqalka Cad ee looga arrimiyo Mareykanka. Bayaan ka soo baxa...

 

Joe Biden ayaa Khamiistii laga helay xanuunka COVID-19, waxaa sidaas shaaciyay Aqalka Cad ee looga arrimiyo Mareykanka.

Bayaan ka soo baxay Aqalka Cad ayaa lagu sheegay in 79 jirkan uu dareemayo astaamaha cudurka oo qafiif ah, isla-markaana uu si buuxda u gudan doono shaqooyinkiisa, isaga oo isku karantiili doono aqalka cad

Si buuxda ayuu u talaalan yahay wuxuuna laba jeer qaatay tallaal xoojin ah. Wuxuu dareemaya astaamo kooban Ayaa lagu yiri bayaanka ka soo baxay Aqalka Cad, oo intaas ku daray in Biden uu billaabay qaadashada kaniiniga difaaca COVID-19 ee Paxlovid, oo ay sameyso shirkadda Pfizer.

"Si waafaqsan tilmaamaha CDC, wuxuu isku go'doomin doonaa Aqalka Cad, wuxuuna si buuxda u gudan doonaa waajibaadkiisa muddadan."

Biden ayaa lagu waday inuu maanta u safro gobolka Pennsylvania, taasi oo qeyb ka ah safarro uu dalka gudihiisa ku marayo si uu u xoojiyo xisbiga Dimoqraadiga kahor doorashooyinka dhexe ee Mareykanka ee bisha November.

Dimoqraadiga ayaa wajahaya doorasho adag oo ay u badan tahay in loogala wareego aqlabiyadda Aqalka Wakiilada iyo Senate-ka.

Madaxweyne Biden ayaa sidoo kale wajahaya waqtigii ugu adkaa muddo xileedkiisa, waxaana hoos usii dhacaya tirada dadka la dhacsan hab maamulkiisa.

Daraasad ay sameysay Quinnipiac University oo la baahiyey Jimcihii ayaa muujineysa in kaliya 31% shacabka Mareykanka ay ku qanacsan yihiin habka uu u maamulayo dalka.

Biden ayaa lagu warramay in guud ahaan xaaladdiisa caafimaad ay aad u wanaagsan tahay, hase yeeshee da'diisa 79 jirka ah ayaa abuureysa walaac ku saabsan saameynta  ku yeelan karo COVID-19.

AFP.